Celia 、大家好，首先，歡迎大家出席今日嘅頒獎禮。我亦恭喜今屆各位得獎嘅年青人。好榮幸，我應該已經係第三次響到同大家做分享。仲記得我舊年嘅分享，一開始就拋左個難題比大家，就係大家響未來一年，點樣對得起「沙田傑青」呢個榮譽。
當然我做人，唔會只係將個問題拋比大家，我自己都會反思，點樣對得住呢個獎項嘅設立。好多謝沙田民政事務署願意撥款支持同信任，亦都多謝香港傷健協會、小童群益會兩間機構嘅通力合作，令到今年嘅傑青選舉，多左一個我‘傻更更’諗出嚟嘅「社區習作」。
大家交嘅「社區習作」我每一份簡報都好細心去睇。因為我想向你地學習，用你地嘅眼光，去睇我地呢個社區嘅‘需要’ 。當中我都幾有感受，甚至認為我地民政署嘅同事，值得響工作上作為參考，如果有機會，我都幾覺得無論我地委員會，又或者專員，可以聽下呢班年青人嘅發現。
我睇得出呢個社區習作，係大家真係有比心機去做。因為今年嘅面試，我留意到大家嘅回答，係比過去嘅踏實、鮮活、容易令人產生共鳴。因為大家都係‘沙田人’ 。
最有趣嘅地方係，你地搵到一D，我地平時比較少留意到嘅細節，無論係心理健康、無論係文化印象都嘗試提出一個，屬於你地嘅新方法。
不過，係咪咁就夠呢？答案好明顯唔係。如果大家仲有印象嘅話，就記得我響訓練分享晚會時，同大家講過推動政政策，要‘吾道不孤’ 。根據社會發展理論，可持續性係一個大議題。
因此大家唔單止，唔應該滿足於呢一個獎，甚至唔應該將你個習作束之高閣。因為蜘蛛俠嘅叔叔‘Uncle Ben’ 講過：能力越大，責任就越大。大家應該要繼續將你地嘅建議深化、細化、甚至推廣，推離開沙田。
大家知唔知道，早排我同沙田青年網絡，為數40幾位年青人，一齊到廣州做義工，先發現，原來，近到響咁繁榮嘅廣州市，都有大量留守兒童，係無乜人去關心佢地嘅！因此呢個獎，沙田區只係你地嘅起點！
各位年青人，我今日企響到（香港伍倫貢學院），感覺嘅熟悉，但又有D陌生，因為我就係，響當年嘅，香港城市大學專業進修學院畢業。一轉眼超過20年就咁過去左。你問我又乜值得懷念，其中一件，肯定係當年，我都未畢業，但已經翻緊工，為復康人士，爭取到全港巴士站頭改建斜台。今日大家見到個斜台，當然，唔知係當年一位大專生攪出嚟嘅！
人生匆匆幾十年就過，實在好應該，響自己青春嘅時候，為自己留個，值得回味嘅好故事。近年，我地成日話要：說好香港故事，我就話響說好香港故事之前，不如大家先說好，屬於你地嘅青春故事，甚至係沙田故事。因為，將來社會，好多有意義嘅改變，可能就係因為，今日在坐各位而發生。
但要做到咁，一D都唔易，甚至比得到沙田傑青難上百倍。不過，日後當你覺得無力沮喪時，我鼓勵大家會聽下柳應庭嘅《大海少年》，當中歌詞講到：
「暴雨烈風，豈願共鳴；讓我陪伴你，講心聲。」
因為我地沙田區青年發展及公民教育委員會嘅仝寅，最喝望就係可以聽到大家心聲，做你地嘅同行者。
再次恭喜大家，預祝大家響新一年：百尺竿頭，更進一步。
多謝各位。
沙田區青年發展及公民教育委員會副主席
葉振東博士
2024年1月27日
沒有留言:
發佈留言