2020年1月11日 - 《第四十集》陳智傑（恆生管理大學新聞及傳播系副教授）：台灣大選，中間力量

由台灣大選，到香港政局，除左有兩大陣營外，都有「第三派」— 中間力量派存在~

究竟「中間力量」喺兩地，不同政治環境，有咩生存空間？會唔會係兩極意見中，可搵到平衡嘅其中一個方法？今次邀請到香港恒生大學傳播學院陳智傑副教授來到，同各位政壇新秀探討下~

節目重溫：https://www.rthk.hk/radio/radio1/programme/young_politician/episode/616582

facebook 播放：https://www.facebook.com/RTHKradio1/videos/2519002208420116/

Youtube 播道：https://youtu.be/dNuZB3Rln5Q

今次台灣大選，除咗傳統藍綠對決之外，外界亦好關注第三勢力嘅影響。太陽花運動後，新興政黨或者政治人物例如柯文哲同時代力量冒起，其中柯文哲兩度以無黨籍人士身份當選台北市長，更於二零一九年創辦民眾黨，提出跨越傳統藍綠定位，為台灣政治帶來一個新出路。雖然民調顯示民眾黨全國支持度接近一成，喺全國不分區有望拎到四席，但對比兩次市長選舉，柯文哲得票少咗接近三十萬，佢嘅政治影響力到底可以維持幾耐仍然係未知之數。而同一時間，時代力量主席黃國昌驚險避過罷免公投，但時代力量已經聲勢大挫。到底中間力量可唔可以改變政壇，依然係好大疑問。

香港同台灣素來都係政治命運共同體，一國兩制嘅本意係向台灣示範，從而走向兩岸統一。但香港先後經歷佔領中環同反對逃犯條例修訂風波，所造成嘅社會撕裂難以修補。舊年區議會選舉更離唔開藍黃對決嘅主調，定位自己係中間路線嘅政黨都受到重創。同一時間，走中間路線嘅政黨係咪幫到修補撕裂呢？例如湯家驊加入行政會議後，政治立場變得極為親政府，佢所創立嘅民主思路就因此爆發嚴重分歧，觸發多人退黨。到底中間派應如何定位？喺現時嘅政治環境之下點樣搵到佢嘅生存空間？擔唔擔心被批評係政治投機呢？

今集政壇新秀訓練班，請來香港恒生大學傳播學院陳智傑副教授同各位傾傾。