今集好可惜，Fackbook播放出左問題，無片睇。但阿澤其實講得好好。學校唔講政治，唔通公義都唔講咩？不停製造敵人，打稻草人其實對當下局勢又有乜幫忙呢？響阿澤身上，我睇到一位年青教師嘅專業精神。
踏入9月，就係新學年開始嘅月份，受到自6月起反修例運動嘅影響，喺中學同大專學界，發起咗罷課行動，要求政府回應五大訴求，令校方以及大眾非常關注，各間院校都有唔同嘅意見，有部分學校認為只需要家長同意信，就容許學生罷課，但另一方面，教育局認為罷課，會為寧靜校園帶嚟政治干擾，更指行動係極不負責任嘅行為，所以強調堅決反對任何形式嘅罷課行動。面對潛在嘅懲罰，一班學生依然選擇喺校園內表明立場，但係教育局只係反覆重申校園內唔應該涉及政治。
而同一時間，全國政協副主席，兼前特首董建華，早前就以「徹底失敗」嚟形容中學嘅通識教育，將社會嚴重撕裂嘅矛頭，直接指向當年自己推行嘅決策，部分人更視通識科猶如「政治科」，向學生進行洗腦，引致呢場運嘅發生。喺8月中，教協發起全港教師一齊守護下一代、為良知發聲嘅遊行，但係就被外界質疑教師違反教育專業操守，擔心喺教學時，會滲入個人政見，所以喺開學前，教育局學校發出指引，提醒教師要「謹言慎行」。處於呢個夾心狀況，一眾教師都可能要面對住好大嘅壓力。
面對以上種種問題與批評，早前教協副會長兼中學通識教師，田方澤就講過作為教育專業人員，受之於社會供養，學習成才，應回饋社會。堅持人權、民主、法治，守護香港核心價值，促進社會進步同公義，為學生帶嚟更美好嘅社會，先係作為教育專業人員嘅專業良知。
今集政壇新秀訓練班，我哋就邀請田sir到嚟到節目做嘉賓，同我哋一齊探討一下有關罷課風波，對學校、老師同學生有咩影響，咁通識科其實係教啲咩？呢一科到底有冇教壞細路呢？
沒有留言:
發佈留言