2016年8月13日政壇新秀訓練班 《第六百一十四集》 - 葉兆輝（防止學生自殺委員會主席、港大教授） - 學生自殺問題

這一集，最值得聽是新秀們的提問，聽過這種直接對話之後，我們或許會明白，為什麼年青人會自尋短見了！

節目重溫：
http://programme.rthk.hk/channel/radio/programme.php?name=radio2/YoungPolitican&d=2016-08-13&p=2517&e=&m=episode

1516學年，有34個香港學生輕生，在3月時更在九天內發生超過6宗11至21歲的學生自殺事件，有至少20人的自殺原因和學業壓力有關。啱啱過去的星期五，再多一個中五學生選擇結束生命，佢之前曾經因為成績及功課問題與家人爭執。

政府今年3月成立防止學生自殺委員會，委員會係7月尾的時候，向教育局提交進度報告，話學校壓力同學生自殺並無直接關係，但處理學生的生活壓力都好重要，更加有委員建議，當局全面檢討教育制度。

係防止學生自殺委員會提出的11項建議之中，教育局接納左6項，包括由下學年起推出先導計劃，同埋派2個精神科資深護士到學校，識別同支援有自殺風險的學生。

不過教協批評，報告冇觸及制度問題，又批評推出新措施的時候，如果冇新增資源，會進一步增加前線教師的負擔，建議當局檢討依家的師生比例，同中小學的輔導服務。

有老師話，教育制度比學生很大壓力同限制，重視升學的學校，又往往對學生成績以外的事關心有限，再加上教學工作繁忙，連了解學生的時間也沒有，批評即使教育局提供講座同專業培訓都冇用，因為無法實行。

香港學生的學業壓力，來自香港的產業單一，通常只有讀商科，先至「有前途」。但大學學位有限，只有不足兩成的學生入到大學，社會都似乎冇為入唔到大學的學生提供出路。呢啲都係香港的結構性問題，只是防止自殺，是不是治標不治本？到底仲有冇其他方法，防止悲劇再發生呢？政府現時的政策又係咪足夠？

今集政壇新秀訓練班，就請嚟防止學生自殺委員會主席，港大教授葉兆輝，同我地一齊傾下。