林校董、蔡校長、各位校董、各位嘉賓、各位老師，各位同學、
大家早晨：
好榮幸，今日得到，大家嘅邀請，出席你地嘅結業頒獎禮。響復常之後，唔覺唔覺，原來我都參加左唔少類似嘅典禮。理論上，結業頒獎禮
之後，應該就已經無堂上，所以結業頒獎禮就係結業頒獎禮，唔係上堂。否則就唔係幾自然。因此，不如我地傾下近期香港嘅得意野。
唔知到，早前，大家有無去政總，對開嘅海傍，影個對小黃鴨？呢對小黃鴨都幾唔好彩，兩次嚟香港，兩次都出狀況，仲要展出一日就自爆。我有位響，傳統電視台報新聞 嘅好朋友，響事發當日，嘅報道，用上「低頭」、「被放棄」、「又吹脹」等形容詞，去報道，變左好似打邊爐生根嘅「扁皮鴨」；仲訪問左一位童言無忌嘅小朋友，話：隻鴨仔「死左」！一件講俗D，唔係幾‘老泥’嘅報告，響佢有限嘅報道空間之下，我相信佢，都幾令到唔少香港人，真係開心翻！
或者，我地先唔講佢出衆而專業嘅報道手法先，講翻隻鴨；點解「被放棄」、又要「吹翻脹」呢？躺平扮生根咪好囉，都一樣好特別。大家知唔知，今年中國嘅高考生，創自1976恢復高考以嚟，破紀錄新高，達1291萬；截止今年4月份，16歲至24歲青年失業達20.4%，即每五位年青人，就有一位失業。響學位貶值，搵食艱難嘅情況下，我地都不得不承認：躺平可恥，但似乎真係有用！何況日日攤響到，咪最自然囉！
問題上，原來攤響到，先係最唔自然。雖然我先父係篤信黃大仙嘅，但我對道學 / 道教嘅認識真係唔深。不過我都會思考「道法自然」呢四個字點解。所謂道，簡單D講就係一種法則，天生我才必有用，就係因為背後有種法則。我嘅先祖係台灣嘅果農，我見過最符合躺平呢種法則嘅生物，就係有吸血虫之稱嘅水蛭，你上網搵下就知，你睇佢嘅形態就知，佢唔躺平先唔‘自然’ 。
所以，自然就唔等於攤響到，自然係應該順應「天道」，有所作為。你嘅形態係點，就應該似翻係一個「人」應該要做嘅野。因此小黃鴨唔係生根，佢被「吹脹」，係必然，呢個就係小黃鴨嘅自然之道。
記得，我嘅忘年之交，台灣嘅佛學大師鄭振煌教授經常講：人生難得。因為根據輪迴嘅講法，你要響六道之中，經歷幾多次，先有一次可以做人，所以無論呢生無論順逆甜苦，都係難得。因此乜都唔做變生根，係咪好可惜呢？
放心，大家只係中學畢業，你人生仲有漫長歲月，就算你現在想變生根，變緊生根，最多都係變左十份之一，仲有九成機會，可以響餘下日子，做翻生而為人應該要做嘅事。但跟住嘅問題嚟喇，咁做咩好呢？
年青人，最講就係feel，我地個年代講feel，你地個年代一樣講feel；所以唔知做咩之前，不如首先問下自己鍾意D乜？
呢個年代，唔知點解，個「膠」字都幾廣泛應用，例如我只有十歲嘅姪仔，好鍾意以「巴膠」自稱，仲覺得好威威。因為佢真係好鍾意巴士，厲害到聽死氣喉聲，都已經大概知道係邊款型號嘅巴士。我對佢真係服到五體投地，作為一位學者，懂得謙虛係好重要嘅，所以佢識我唔識，我就覺得佢好厲害。佢阿爸好擔心阿仔，驚佢地日真係去左揸巴士。
我任職嘅港專，以推動職業專才教育為已任，相信每位年青人，都係可以「找到我想」嘅，因此我反問我細路：揸巴士好差咩？我地現在搶人才，都係驚緊無人揸巴士。何況個重點唔係巴士，而係佢有鍾意嘅感覺，人無野鍾意，就無動力，無野執著！ 鍾意嘅感覺好重要，根據社會學嘅鏡子理論，就係因為知道咩叫：「鍾意」，我地就見到自己嘅存在價值。孫中山先生曾經講過：人生唔如意嘅事十常八九；咁點解當年佢仲走去攪革命？因為佢真係愛中國，愛四萬萬蒼生。所以，當你人生遇上低潮，你仲記得，你響青松中學嘅歲月，曾經有你鍾意嘅嘅野，呢份鍾意嘅感覺，將來往往係陪你行過死蔭幽谷嘅好朋友，因此，乜鍾意巴士，好差咩？我唔覺囉！
跟住問題又嚟喇！我到現在都唔知自己鍾意咩喎，知又如何，有乜用呢？作為過來人，我可以話你知，你唔係唔知，係未睇到，唔知你要搵嘅野，就係響你身邊，根本就不假外求。大家知唔知附近嘅秀茂坪開村39年，你地間學校35年，即係話，你地同條村係接近同共成長。咁你地響到讀咁多年書，你地有無留意到，村內多左幾多老人家？有無D老店鋪無左？附近嘅撈撈麵有無貴左？其實你地先最有話語權！問題上，我地呢代人，睇得手機太多，太少去留意身邊嘅人同事，所以就算有嘢鍾意。都留意唔到，有咩同自己有關。
五四運動嘅先賢梁啟超先生講過：俠之大者，為國為民；俠之小者，為友為鄰！成條村咁大，每日經過咁多人同事，只要我地嘗試放慢腳步，放低埋部手機。就會發現可能有D野，係我地想做，力之所及，可以作出微細而具義意嘅改變，將來可以話翻比自己聽嘅好故事。
講翻秀茂坪村，我記得我畢業嘅時候，第一份工，就已經認識呢條村，但我當時認識呢條村，係發現原來佢都幾多通道，係唔適合傷殘人士使用，之後，我就試下同D傷殘人士一齊爭取下。今日，我相信呢條村已經解決左呢個問題。
2013年，政府啱啱公布第一條貧窮線，當時全港最窮嘅區，就係觀塘。貧窮線令我再有一次機會，翻到秀茂坪村做調查，發現秀茂坪村、同秀茂坪南村嘅居民，對「窮」嘅體會都好唔到。跟住我又反思，呢個思考到今日都未完，就係制度唔夠公平嘅話，淨係派福利，到底有無用？呢D工作上嘅小故事，其實何足掛齒？重點係過程中，我發掘到原來我鍾意做「人」嘅工作，我願意與弱勢同行。老子《道德經》第64章講：「千里之行始於足下」。呢D搵對腳行出嚟嘅鍾意，應該係手機比唔到我地嘅。
但淨係睇一條村，格局似乎太細。你地咁年輕，最少你應該相信你自己係有無限嘅可能。我記得我響城大讀大專嘅時候，我有一位好嚴嘅老師叫Patrick，佢教我地，人嘅成就同學歷成績無必然關係，但同你嘅胸襟有莫大關係。所謂海納百川，有容乃大。但講就好似口號，要做又點做到呢？
唔知大家有無睇過金鏞嘅「射鵰英雄傳」同「神鵰俠侶」。就算無，我諗大家都應該聽過郭靖，同楊過。我細細個就諗，佢地咁年輕，點解勁得咁交關？後來，我發現佢地兩個有個共通點。就係郭靖嘅結拜兄弟係周八通，楊過嘅忘年之交係東邪黃藥師。人嘅一生畢竟有限，你地無可能經歷我嘅人生，但聽 / 借鏡係可以嘅！佢地就係有胸襟，同比自己年紀大好多前輩做朋友。所謂：他山之石，結果就成就左，呢兩位家傳戶曉嘅小說人物。
探訪長者嘅義工服務，我估你地有部份同學有參與過，但你地有無D年紀大自己好多嘅朋友呢？我成日同D學生講，畢左業之後，大家就係朋友。我地都年青過，只要你地肯，其實我地好樂意做你地嘅朋友。能夠讓後輩行少D寃枉路，我地都開心咖。
以上我所講嘅嘢，唔係品學兼優嘅學生先做得到，而係係人都做得到。最少企響你地面前就有一位。我嘅年青時代，父母早死，家境清貧，我16歲開始要半工半讀；響油麻地果欄，三山五岳我係乜人都識，當時唔知，亦無試過去申請綜援，反而就試過響荃灣四坡坊轉售文具，又試過響中國染廠大廈，即係現在嘅中染新城學造、學賣出口手錶。
就嚟放榜嘅DSE，我當年考左五次。但就係咁一路走來，我就慢慢認識自已鍾意做D乜？可以做D乜？唔好睇少呢D小諗頭，好多人生活有改變，可能就係因為呢D有意義嘅小諗頭。你去開官塘，揾間十二蚊店睇下佢D生活小發明，就知我無o厄你。
仲記得好多年前，我去探訪伍少梅中學，一位成積中下，但好鍾意四驅車嘅學生，佢留意到佢阿婆手指退化，執西藥食好煩，所以就利用四驅車嘅小摩打，響老師嘅鼓勵下，土法做左個「西藥自動分流器」比佢阿婆，我當年大讚佢個設計大有作爲。近年我見到市面有類似嘅發明，唔知係咪同佢有關呢？係嘅話，佢當年行出嘅一小步，就係解決老年化社會問題嘅一大步。
講到呢到，你都仲係唔知自己想點？唔緊要，你今日仲可以問老師，聽日，就真係衹可以問天。聽落好似好悲，但原來個天，比起我地做老師嘅，更早比左答案大家。我一開始時講嘅天道，咪就係天道酬勤囉！所謂學生學生，學極都生。成長就係一次又一次try and error 。
你地現在最大嘅本錢，就係有青春，有時間大膽去try，如果唔大膽去try，又點知有咩error呢？說好香港故事之前，相信必須響成長之中，先努力，說好一個屬於你地自己，獨一無二嘅故事啦。記得《周易‧象傳》講天行健，君子自強不息。呢個行字除左解運行，其實仲係有實踐嘅意思。
最後，希望大家今日，最少會記得「做人不要太生根」。生根都係留翻嚟打邊爐食。同時，祝願各位同學，典禮後，行出校園，就係開展你呢生好故事，嘅新一步。多謝大家。
港專學生與社區參與助理總監
葉振東博士
2023年7月11日
沒有留言:
發佈留言