各位美國o既朋友大家好：
我係來自香港o既葉振東，新年開始，先祝各位聽眾新年進步，響新一年健康、平安，同快樂。好高興響新一年開始o既時候，有機會同美國朋友分享一下我對時事o既睇法。
呢個節目叫：時事觀察，而我生於香港，媽媽係台灣人，現在又響廣州中山大學繼續我o既博士課程。兩岸三地唔單止同我有關，而且仲係我一直關注、研究o既課題。所以，響呢個節目裡面，我會主要同大家分享一下，我對近日兩岸三地，一D影響政治、經濟、社會民生o既大事。講到兩岸：傳統o既政治智慧話比我地聽，中美關係o既主軸，就在於台灣問題。o甘即是話，我響節目裡面都唔會忘記評論一下中美關係，對我地大家之間o既影響咖！一D周邊話題，好似日本，歐州、甚至係恐怖主義，中亞吉斯坦文化；如果大家有興趣，我都希望有機會響到同大家分享。
好喇！可能好多美國o既朋友都聽過，至從舊年20國集團會議被形容G2，那中美兩個家會議之後，大家就已經開始好留意2012，被稱之為：The Year of Change。最明顯一個像徵意義就係，全球主要經濟體，都會響今年裡面換班，選出新o既領導層。好似歐洲經濟大國法國、東歐主要國家俄羅斯、亞洲，有金磚五國之首o既中國，仲有我現在同大家分享緊o既美國。
當中，o既中國都真係夠熱鬧，兩岸三地少有o甘，響同一年裡面進行大選，或者換領導班子。大陸有十八大換屆；唔覺唔覺回歸已經十五年；全球三大股票市場之一o既香港，我地o既第五屆特區行政長官亦會響今年o既3月25日產生。最快發生，對岸o既台灣仲有10日左右就會舉行。今次台灣大選係台灣首次將總統選舉，同立法委員同一日選出。台灣o既民眾一日之內都要投幾多次票，實在真係幾忙。
而兩岸三地o既領導人或者政府出現轉換，都會影響到今後幾年兩岸三地，以至同美國之間o既關係發展。響之後o既節目裡面，我地仲有大把機會同大家進行分享，同分析。一年o既開始，或者，就容許我從香港開始、然後，中國大陸、台灣，同各位作出一次簡單o既大事回顧丫！
2011年香港大事回顧部份：
香港過去一年，我其實覺得表面上無o也大事，實際就暗湧處處。有一d坊間o既整合，甚至我覺得，同我地o既生活其實無o也好直接o既關係。好似由陳振聰挑起o既華懋千億遺產爭奪戰、賭王何鴻燊家族爭產風波、甚至無線電視業務總經理陳志雲涉嫌收受利益貪污案件。對我地來講，只不過係茶餘飯後多個傾計話題。講唔上係o也野大事！反而以下幾件事，我就真係覺得好值得留意：
去年o既今日，就係香港支聯會前主席司徒華因肺癌病逝，終年79歲，各界哀悼。華叔，同現任立法會主席曾鈺成，可以講得上係泛民，與建制陣營兩位齊名o既人物。兩位都係堅持自已o既信念，貫徹始終，經年如一。
華叔，原本只是一名平凡的中學校長，1973年他為文憑教師爭取合理薪酬，並創立教育專業人員協會，數十年來，成為香港最主要o既教育人員團體，資產過億；每逢假日，我地就會響旺角o既教協逼滿左買平野o既市民。後來至1978年「金禧事件」領導教師抗爭，其後循教育界躋身立法局，正式涉足政壇。
華叔講過：佢一生創立左三個組織，依次序最滿意係教協、第二個係八九民運之後創立o既支聯會，最後先係港同盟，即係之後o既民主黨喇。司徒華自傳《大江東去》去年7月書展推出，銷情理想。書中透露原來佢曾經係共青團員，甚至曾經想加入中國共產黨。
我認為呢D講發都唔會令華叔一生沾污，一來平常心去睇，共產黨未又係一個政黨？香港今日不少腰纏萬金o既國企上市公司老闆，未又係共產黨員！華叔o既表述反而肯定佢一生追求善、與美o既高尚人格。大家唔好忘記，華叔走o既時候係79歲，佢二、三十歲時，中國共產黨一定程度上，係代表對烏托邦o既追尋。
反而，呢位超重量級政壇前輩黃鶴西去之後，對香港政壇就起左立竿見影o既效果。華叔一去，民主黨，以至泛民陣營內部就難以再搵一位可以「一鎚定音」o既人物進行協調。剛過去o既11月6日區議會選舉，泛民可以用「零協調」及慘敗來形容，因為響地區工作不足，社民聯、人民力量追擊之下。泛民痛失多個議席。好似響尚有人口增長o既北區，泛民竟然輸到得翻一席。 相反，第二件認為值得同大家回顧o既事，就係區議會選舉中，建制陣營大勝。單係民建聯一個政黨，竟然可以響全港四百多個選舉議席中，取得136席o既佳積，一D區域建制陣營候選人大幅拋離泛民主要對手，近一倍票數。進一步肯定左民建聯將會係響比例代表制之下，香港o既第一大黨。 點解呢點o甘重要呢？因為民選區議員，將會全部成為第五屆行政長官選舉委員會當然選委。響一千二百個選委裡面，民建聯一個政黨已經有超過140票。o甘即是話民建聯一定會係下屆行政長官參選人o既爭奪票倉，佢地甚至有可能成為阿爺，即係中央政府唔係好想見到o既King Marker。睇下一月一號，梁振英突然路過，被形容為不請自來，參與民建聯創黨二十周年會慶。就知道民建聯今日響香港，你都未話唔重要。
接住落去，第三件事當然我地要提下特首選舉，到目前為止，我地好肯定有四人會參選下屆特首選舉，包括：梁振英、唐英年、與及泛民何俊仁與馮檢基。之前其實仲有兩位擬似候選人，一位就係范徐麗泰，一位就係葉劉淑儀。我就認為，范太只不過係聽指示辦事，葉劉淨係想撈D政治油水。兩位早已經係唔入流，但就令到今次選舉多左好多戲劇性，同娛樂性。
最有可能逐鹿中原o既就只有雙英，即係唐英年（唐唐），同梁振英（CY）喇！原先，之前只識講感情缺失，連搭地鐵都唔知去邊o既唐唐，民望大幅被CY拋離超過20個百份點。我相信如果呢個情況響美國發生，被拗離果一位無可能會成為候選人。
但經過去年第二場重要選舉，12月11日特區行政長官選舉委員會委員名單出左來之後，香港o既民意真係幾現實，唐唐o既民望又大反彈超過10個百份點。因為大家計一計，就發現CY o既鐵票竟然只有38張，比入閘o既150票差好遠。相反唐唐o既鐵票最樂觀，可能已經超過300票。加上佢近期D公關，同對答又真係好左，已調就出現左改變。
特首選舉相信係未來幾個月，香港o既重要新聞，我會為大家不停追（足宗），分享。
唐唐係唔係真命天子，中央有無祝福，響現在o既環境之下，其實真係幾重要。最少，我相信大部份香港人都會認同中央，會影響到民建聯選委o既投票意向。所以，大陸領導人，邊位仲繼續享受緊，終生「政治權利」。就有可能會影響全局發展。
舊年7月，香港o既亞視新聞，突然公布江澤民死訊，我認為真係香港o既大事。消息公布之後，香港各界嘩然，真係嚇到鼻哥窿無肉。其後，官方新華社否認有關消息。中聯辦批評亞視嚴重違反新聞職業操守，亞視撤回報道並致歉。大家先知道原來係假消息。期後，大陸十一國慶，江澤民再次在鏡頭面前出現，大家更加嘩然！
呢件事唔止反映，大陸領導班子換屆由於唔算透明，所以大家知D，唔知D o既情況下，極易造成恐慌，同以為有派系鬥爭。能夠做到不戰而屈人之兵o既列根總統過身，美國以至全球都有唔少人好傷心，不過我唔相信佢o既離去，會對美國體制做成任何沖擊。
事件仲帶出亞視管理層，有可能汗涉到亞視新聞部，o既編輯自主權。呢件事令到人稱榮總，o既梁家榮辭職。仲攪到要上立法會開特別會議聆訊。新聞自由，可以話係香港o既核心價值。響香港當然激起牽連大波。最後，雖然都唔知查左D o也野出來。但就令到唔少香港人攪心新聞自由喇！
除左以上五件事之外，特區政府首次向市民派錢；肯定係香港o既大事。大家都知，同樣係特區o既澳門，已經向澳門永久居民，以至非永久居民派錢好多年。呢樣所謂還富於民措施，係唔係德政我就覺得好難講，但就一定會贏到短暫掌聲。最初香港政府又想與同香港市民分享財政盈餘，又擔心推高通脹。所以，就建議向有強積金戶口o既香港永久性居民，每人每入住入六千蚊。
點知，呢種做法被形容為「未見官先打八十大板」。因為，強積金管理人，牽先可以從政府o既大額注資，得到豐厚o既管理費。響現行制度，同正常情況之下，我地係要到退休先可以拎翻畢強積金。如果好似我o甘，三十出頭，要三十年之後先可以有錢拎。年年通脹，今日政府比o既六千蚊，就好有可能到時得翻幾蚊！舊年香港股市慘不忍睹，早前就已經有報紙為我地計過，舊年每名香港市民輸左近50萬港元。數字或者係跨張左。不過，我地o既強積金戶口的確管理費照收，但個本金就人人都縮左水。
後期，政府熊度一百八十度改變，改為向每名香港市民銀行戶口注資六千蚊。結果又攪到非永久居民，新移民，人人都話香港佢地有份，都要有資格分！生活唔憂o既中產，或者係富裕人士就唔明香港政府點解要o甘做，仲出左位周來派錢，送暖o既紫荊女俠。事件擾攘大半年，直到政府改為自已向政府申請，同動用關愛基金，處理非永久居民，新移民o既需要，事件先叫告終。
經此一役，我地o既財政司司長曾俊華就好少露面。連今年o既財政預算案諮詢廣告到平實左好多。政府派錢都派到周來比人鬧，我相信都算係奇聞喇！
除左，以上o既大事以外，我認為政府為壓抑樓市升暖，金管局6月收緊按揭成數、其中1000萬至 1200 萬的物業，最高按揭成數由6成調低至5成，即是說所有1000萬以上的住宅， 最高按揭成數為5成。700萬至1000萬的最高按揭成數調低至6成，最多可借500 萬 。政府立例規管一手樓銷售，日後要以實用面積，取代建築面積、新界丁屋潛建問題，（湯）房，年底旺角花園街唐樓大火，造成九死多人受傷o既事，都係好值得我地留意。最重要係，個問題未解決，仲會繼續燃燒。
以上多個問題，都有一個共通點，就係同樓有關。香港樓價有幾高，早就世界聞名。由於普羅大眾無法安居，就只有走到鄉郊租村屋，又或者租市屋（湯房）。o甘當有意外o既時候，原來只有一梯兩伙o既唐樓，竟然就變左二十幾戶人o既湯房。人多左o甘多，要逃生時，難度自然增加，死傷就會好嚴重。
今次，就同大家講到呢到，下次再同大家回顧一下兩岸o既風風雨雨丫！
.jpg)
.jpg)
