首先，我恭喜今屆各位得獎者。作為評判之一，我以前都曾經響十五到十七歲時，三奪大埔區傑出服務公民獎，所以回憶好深；而呢種回憶，亦令我為大家好擔心。其實大家令左呢個獎之後，到底想點？有乜用咖呢？
對大家嚟講，今日只係開始，最少在未來一年裡面，大家要對得起呢個獎，對得起「沙田傑青」呢個名。
就係因為呢份擔心，同關心。所以大家如果有印像，就會記得我響面試時，問題都幾尖銳。原因係，我希望大家可以從你地嘅成長，對你地嘅生命，係有啟發，係曾經活過。獲獎之後，要對你嘅朋輩，發揮正面影響嘅作用。
更重要係誠實面對你自己，亦都誠實面對沙田區。其實大家對沙田了解有幾多呢？參與左幾多？貢獻左幾多呢？定係繼續連《青年發展藍圖》都無睇過呢？沙田節都唔知道呢？
因此呢個獎係榮譽，亦係鞭策。我唔知到，大家曾經拎過幾多個類似獎項？我以前都拎唔少咖！不過因為我係靠自己，半工半讀長大。所以我拎左嘅獎，好少會再睇一次，生活逼人，無時間嘛！但係咁就令我明白：忘記背後，努力面前，向著標杆直跑嘅意義。
所以，大家今日多謝完自己，更加記得要多謝爸爸媽媽同提名人之後，過去嘅野對你應該係已經無意思。記得嘅，應該只係呢個獎嘅重量。
我衷心希望，我出年仍然有機會，響呢個頒獎禮上見到大家。最後我多謝沙田民政署、青年活動委員會、最重要係香港傷健協會賽馬會沙田青少年綜合服務中心嘅大力支持，仲有小童群益會，令選舉可以順利完滿完成。祝大家有個愉快嘅晚上，聽日以「沙田傑青」之名邁向新的一天。
多謝各位！
葉振東博士
沙田區青年活動委員會副主席
2023年2月24日（晚）
沒有留言:
發佈留言