幫政府宣傳下先，我已經打左兩針疫苗，所以可以除低個口罩，比大家見下我個樣幾秒。
各位年青人午安，我係葉振東：
多謝大家唔介意，邀請一位唔係幾年青嘅我嚟，參與尋找青春的你@SHATIN啟動儀式，其實係你地令我感到光榮。
原先我都想苦練首歌，跳下街舞嚟鼓勵下大家，但諗一諗獻醜不如藏拙，所以都係算喇！
但我發現每一首歌、每一隻舞都係反映緊大家身處嘅時代面貌。
所以響我眼中，係無乜歌，唔可以唱；無乜舞唔可以跳！因為有咁嘅時代，自然有咁嘅歌，有咁嘅舞。
好似今年我聽過柳應廷嘅「神奇之路」、姜B嘅Dear My Friend；可能對時下好多香港嘅年青人嚟講，都係幾有共鳴。
同時，歌曲舞蹈，除左係雅俗共賞之外，仲係建立共同語言嘅一種非常好嘅工具。
我記得幾年前我去過波斯尼亞。波斯尼亞響過去幾十年嘅歷史，可以用慘痛嚟形容。我當然唔識波斯尼亞文，亦唔係到到有英文。但當我響舊城，聽到見到當地嘅小朋友響到載歌載舞時，我亦好不自覺咁跟住佢地跳埋一份。
我相信當刻嘅歌、當刻嘅舞，係熟於佢地嘅。所以，今日雖然係個比賽，但香港是你們的，也是我們的，但歸根結底最後也是你們的。所以，我想各位年青朋友，大家放膽唱出，大膽跳出熟於你地嘅歌、你地嘅舞，令各位無悔青春。
最後，我再次多謝大家請我嚟，亦多謝香港中華基督教青年會顯徑會所，及香港中華基督教青年會沙田青少年外展社會工作隊，合辦一個咁有意義嘅活動。
亦要多謝沙田區議會贊助啦！各祝位有個愉快嘅下午，多謝各位。
沒有留言:
發佈留言