明愛馬鞍山中學畢業禮
主禮訓勉致詞
霍校監、吳校董、曹校長、張委員：
各位畢業生，各位老師同學，各位家長、大家午安：
好榮幸，今日得到，大家嘅邀請，響大家人生一個重要嘅日子，出席你地嘅畢業禮。我首先祝大家前程錦繡。
理論上，傳統畢業禮之後，應該就已經無堂上，所以我無打算響畢業禮上，再說教多一次。免得大家第二日響沙田見到我，都唔想打招呼。不如我地傾下，大家畢業之後，第一件想去做嘅事係乜野？
我記得當年我畢業嘅時候，因為父母好早過身，屋企環境當然唔係幾好。所以我都未畢業，只係考完晒試咋，第二日我已經翻緊工。係生活逼人，亦都有少少可惜，因為我無諗過自己想做乜？想玩乜？現在又通關復常喇，所以，如果有同學話我聽，佢聽日去旅行，去台灣好，去日本好，只要你可以承擔你自己嘅日常生活開支，響我眼中都係無問題，甚至我鼓勵你畢業之後，盡情去玩。現在去玩，最忙個位朋友應該叫ig；問題上佢往往記錄太多、記憶太少，而且仲唔係幾誠實，因為佢最重要嘅作用係o厄like。
所謂讀萬卷書，不如行萬里路；記得以前有套印度電影叫：一百萬零一夜。對你地嚟講套電影，同粵語殘片差唔多。但各位響我面前，就好似飾演18歲嘅主角賈馬、馬利一樣。佢雖然最後都有少少運氣，但最關鍵係佢認真、盡情去經歷佢每一段嘅成長過程。可以劇透少少比大家聽，電影嘅第一幕，就係賈馬、馬利為左執一張明星卡，而跳落一個充滿“便便” 嘅廁所。佢有咁深刻嘅印象，當然就響比賽第一關順利過關。
所以，當大家去旅行時，有無諗過你一生只可以活一次，人生本身就係一次好好玩嘅旅程。將來，我有機會，再遇翻大家，同你地傾計，你地展現出嚟嘅內涵，就係從你人生旅程積累翻嚟。最簡單，要好玩唔會順風順水，國王之淚太易過關，你都無興趣玩啦！所以，要成就解鎖，我地就要識得解難。我記得我以前中學時代，都好鍾意打羽毛球，但當時嘅翻學皮鞋係無車線嘅，好易打爛，又無錢買過。咁點算好？除左自己學補鞋之外，就係我觀察到地盤叔叔對皮鞋好襟，不恥下問之下，先知深水埗有間鞋廠叫「步昇」，一對勞工鞋當年唔洗$100蚊，但就著到我畢業都未打爛！
除左解難之外，玩都要「毋忘初心」，唔好忘記母校埋藏響你地心裡面嘅種子，人生玩得越興奮，就越多誘惑；或者係榮譽、或者係利益。到時你可唔可以把持得住，做到「認認真真做好人、堂堂正正回母校」，就係睇你嘅人生旅程上面，仲記唔記得彰顯天主嘅仁愛同公義。
我係信基督教嘅，聖經教導我地，無人因為行為而得救。但行為唔好，就更加無得救。所以，點解我地都叫讀書人，讀書嘅目的就係格物明德。響你嘅人生旅程上面，見到唔公義嘅野，你應該要發聲。
可能大家都知，我係香港電台第一台《政壇新秀訓練班》嘅主持，我都無諗過，我呢趟旅程，會做左七年主持都仲做緊。但你問我點解，仲敢做政論節目主持？除左係遵守我中學時代恩師李家駒嘅教誨：「擇善固執、堅持原則」之外，我會答你：「只要我可以堅持，我想繼續提供一個開放嘅發聲平台，比大家參與。」
當然有時，實在係時不予我，我試過去奧地利旅行，去到先知落大雪，令到火車取消，延誤左行程。但《孟子：盡心上篇（第九）》話比我地知：達則兼善天下，窮則獨善其身。所以就算未有機會不平則鳴，都最少要留住有用之軀，唔好人云亦云，或者隨波逐流。《孫子兵法第四篇（軍形）》講：善守者，藏於九地之下。我作為過路人，我可以話比大家知，你呢生人，除左訓覺之外；花最多時間嘅，應該係等待時機。
咁等好悶咖喎，唔好玩咖喎！有乜可以做呢？我估大家應該無睇過，由湯漢斯主演嘅《劫後重生》，佢遇上意外，一個人流落荒島，悶到同個排玩Wilson傾計。大家有無試過自己同自己傾計？或者幾耐無試過自己同自己傾計？自己同自己傾計，聽落去好似有D病態，但個重點係大家要誠實面對自己，面對你跟住落嚟要走嘅路。如果你連自己想點都唔知，咁就做乜，都覺得唔好玩咖喎！
我諗你地大家都唔知，你地未入學，我已經識得你地間學校。當時係歐柏青校長，現在我同歐校長仍然響香港善導會一個顧問委員會，一齊做義工。你地以前係實用中學。我任職嘅港專，係以推動職業專才教育為已任。我相信兩間學校都有D共同價值觀。就係我地相信年青人可以多元發展，可能性係無限，透過呢個學習過程，大家係可以找到我想嘅！
但就算我地有呢個使命，大家都要千里之行，始於足下。你地現在最大嘅本錢，就係有時間去試、去體會，去認識自己；我好清楚年青人有夢想，唔去追同條咸魚有乜分別？我記得我響城大讀高級文憑，嘅最後一餐飯，我老師張楚勇博士同我地講，搵工有時好似搵老婆。有D人一見鍾情，有D人未搵到之前，羅列一大堆條件；到比佢搵到位，附合條件嘅女朋友，點知一坐底食飯，唔夠三分鐘你走入廁所嘔嘅！咁即係你之前講嘅條件，都唔係條件，唔適合你。
所以我地要把握機會之餘，仲要去明辯，到底個D機會係唔係適合你發展。我年青時代，雖然家庭環境比較唔理想，但長大之後就可以比我有少少任性。我鍾意嘅政治、社會服務、教育、商業，仲有傳媒；我通通都試過。我第一次集資，就為一間上市公司集到八千萬，但我最後發現我係鍾意做育人嘅工作，所以我博士畢業之後，就去到港專與弱執學生同行。
近年政府鼓勵年青人到大灣區發展，我認為認識大灣區、了解創科發展對大家嘅人生旅程一定無壞。但社會係多元嘅，發展需要亦都有唔同。AI再勁都要有人識煮飯。你地社會工作部，以前一位督導主任，我老友：叫顧振華，佢成日講笑咁講：明愛嘅朋友活得好光明磊落，因為從來都唔玩暗戀。所以要誠實面對自己，認識過、體驗過之後，發覺唔適合自己嘅發展嘅機會，廣告都有教，最緊要識得講：唔好！
最後，我想同大家分享，港專每年開學，我都有一個機會，同毅進學生，九月改為應用教育文憑學生講幾句說話，因為個課程好短，只有一年，師生關係唔易建立。所以，我往往嘅結尾都會留一個問題比大家，就係一年之後，你見到我，你可以同我分享一個小故事，話比我知，你過去一年，係咪曾經活過嘛？我已過世，大埔王肇枝中學潘祝桓副校長比我嘅家書話：好趁少年時代多學多做，免得老來悔當年。
如果大家對我以上嘅分享，有感受嘅話，我鼓勵大家可以響Youtube搵一首1992年，張學友嘅舊歌，叫：「歲月留情」嚟聽下，記得留意下D歌詞，特別係其中幾句歌詞：
//忘掉了許多，昨天喜與悲；回味每一篇心中日記，仲有
人生並沒難過。//
最後，願主祝福大家，再次祝願大家前程錦繡之餘，亦希望大家呢生人玩得開心，係真係生活過，而唔係生存過！而我會繼續響沙田區，等大家將來同我分享，你人生旅程嘅故事。多謝大家。
沙田區青年發展及公民教育委員會副主席
港專學生與社區參與助理總監
葉振東博士
2023年6月2日
沒有留言:
發佈留言