香港電台.（2025 年 8 月 30 日）。《第三百一十七集
政壇新秀訓練班結業回顧》[廣播節目]。政壇新秀訓練班。香港電台第一台。https://www.rthk.hk/radio/radio1/programme/young_politician/episode/1044083
//（葉振東）講到電台，咁都要感謝主，多謝電台、比左好漫長嘅歲月我去向年青人學習，相信無論係我地，定係收音機傍邊嘅聽眾，都感到，呢接近十年時間，香港變化好多。我諗任何年代都要聽年青人意見，比個機會佢地大鳴大放，夏禹治水、貴乎疏導，我成日講：年青人無棱角，邊可愛咖？
所以，我地要慎防，我地會唔會唔覺意，培育左佢地講一D，我地想聽嘅意見，而唔係佢地嘅心底話。我舉例，我都經常響內地出席一D典禮，獲獎者往往會表達：多謝黨和國家，呢個係內地嘅文化。但佢地落台時，我都會提佢地：都要多謝爸爸媽媽先喎！因為如果都唔敢去表達心底話，咁將會係社會進步嘅重大阻力。因為毛澤東：世界歸根究底是屬於你們的。
仲有歷任台長，監制同我一齊建立呢個青年論政空間。我校長一直放人，比我做節目。
我只係一位窮則獨善其身嘅老師，我對節目結束我係睇得好開，現在開學前結束，簡直係好時機。因為我連連都見住學生入學、畢業係好正常。同有21年，已經比我想像中長左好多，無論係節目，定係我個人。
最後當然要多謝，咁多年嚟數以百計嘅政壇新秀，有D去左外國發展，有D都成家立室，大個仔大個女喇！睇到你嘅成長同九年前，啱啱響港台嘅相片，我都覺年華老去。
仲有最少幾百位嘉賓咁比面我，有時我都幾唔留手，但我都係希望，唔好，亦唔應該做回音谷，比多D多角度聽眾思考，特別響香港，新嘅政治體制之下。我成日覺得，如果每個禮拜，我地傾一個鐘頭，節目完喇，我都無一分鐘，可以令聽眾諗多一下，覺得：係喎！要諗諗，要關注，點解無討論嘅？我係對唔住大家，浪費大家時間。
更加要多謝收音機旁邊嘅你，各位聽眾咁多年嚟對節目，對我嘅支持。以前有聽眾寫信比我，過節寄卡比我，甚至有冚旗的士司機，響港台門口，順路車左我去樂富，因為佢係我fans。到我早前身體抱恙，大家響社交媒體留言比我。我都一一銘感五內，證明我呢9年8個月係曾經活過。
最後最後，真係要多謝埋我太太 Candy，佢好清楚我對培育青年嘅心意。我好記得，成十年前，當時嘅台長阿重，搵我做主持時，有個對話都幾得意：「佢話：你唔幫手，我就摺左個節目佢」。我時個反應係：「你都比我同Candy傾傾先咖」雖然我好清楚，就算Candy當時唔同意，其實我都會響二台做義工。咁因為要就節目，the show must go on。我地嘅嘅生活，有時都無可避免要調動。佢都好包容。
仲記得2020年7月4日，當日係《第六十五集》，我地請左張炳良教授：香港特區管治。我返港台時，出門口時，我太太問我：你諗住仲繼續做落去？咁現在因為節目調動，真係唔洗做喇，你可以放心。咁唔知佢係咪開心得濟，所以整定散水餅，送比大家。
我自問係一個老派人，當然我都會聽流行曲嘅，我原先想用一首1982年，陪我成長嘅《誰能明白我》同大家講拜拜，但真係用呢首歌，咪即是同年青人劃上句號！咁啱啱立左秋，或者，就容許我以尹光近年一首，令我好有共鳴嘅歌《Dear Myself》，同大家講拜拜。當中嘅歌詞，都真係好應景，好可以概括，我呢九年幾響香港電台嘅心聲。各位聽眾，我嘅朋友，我係政壇新秀訓練班嘅班主葉振東博士，節目終於完喇，我地有緣再會。多謝各位。//
