首先,感謝主。兩個人可以一齊行過11年絕對唔係一件事。
仲有同我一齊成長嘅三位好兄弟:阿初、民少、家達。
我地十六、七歲響油麻地天后廟玩結拜,一過,就已經又一個十幾年,認識當然更長時間。坦白講:同一個阿爸阿媽生出來,大家經歷嘅時間都係差唔多。我男家人丁幾單薄大家都知,但因為你地令我有兩台家人席,仲有每年初三可以去同達媽拜年,食佢者嘅飯,整嘅糕。
《左起:黃衛民、陳應初、鄭家達》
我地十六、七歲響油麻地天后廟玩結拜,一過,就已經又一個十幾年,認識當然更長時間。坦白講:同一個阿爸阿媽生出來,大家經歷嘅時間都係差唔多。我男家人丁幾單薄大家都知,但因為你地令我有兩台家人席,仲有每年初三可以去同達媽拜年,食佢者嘅飯,整嘅糕。
有D組織,有D機構響我眼中從來並唔係一件工具,而係有生命,甚至係我仔仔一樣。我19年前創辦嘅卓施,各位今日已經長大嘅年青人,你地響不同領域發光發熱,有時我聽到其他人對你地嘅讚賞,我真係開心過自己得獎;你地揮下手嚟睇下。
《卓施社會服務團》
香港青年啟動既子弟兵,你地揮手嚟睇下;你地嘅成就,係我最大嘅驕傲,多謝你地令我有勇氣,信心承擔起我嘅使命。
《香港青年啟動》
我同家玲響埋第一年,我就開始諗結婚。或者係因為我一直都唔算有一個家,長年以來,跑南走北,感覺上都幾飄泊。所以我好想有自己屋企,當時我已經諗緊,如果我要結婚,到底要請邊個嚟?好在當時,我無將個名單寫落來,如果唔係我自已都驚,因為今日響到嘅朋友,同當日我所諗嘅,有接近一半唔一樣。當然留得翻落來,呢一份情一定可以經得起考驗。
我唔單止要多謝你地,仲要多謝你地比左個家鄉我,我發夢都無諗過,香港以外,竟然有一個地方我會熟得咁緊要,仲要咁多當地嘅朋友。
最初我都諗住玩玩下,點知越玩越上心,亦賺到你地一班手足。
無你地,我叻到識飛都無發揮機會。尤其是我頭先見到小明,我真係好感動!
響我最失落嘅時候關心我,比機會我。如果我係一架B52轟炸機,咁你地就係造就我,比左條跑道我嘅人。
一個人,可以活到今日,企響你地面前,唔易呀!有一D人好似流星o甘響你生命流過,但留底嘅痕跡卻係永遠嘅!剛才我收到消息,楚勇Sir雖然今日突然唔能夠出席。但我諗佢都無諗過佢一句:「搵工一如搵老婆」對我影響o甘大,但我搵到喇,最少我到今日依然好鍾意聽到家玲把聲,每日都好想見到佢,同佢一齊食飯。
《與張楚勇老師合照》
有一D人,係你到死果一刻你依家會感謝佢,當你仲你頑石時,佢力排眾議認為你可以成器;當你受千夫所指時,佢當晚同你食飯安慰你,仲擔心你教會自殺;當你意氣風發嘅時候,佢一盤冷水叫你醒下。甚至我讀大學第一畢學費,我當時屋企環境又唔好,我唔敢同家姐講,佢知道我自尊心強,主動借比我。大家經歷十幾年,我相信生個仔出來,都係差唔多o甘。我以前訓示我卓施門人:「吾與李家駒老師共事,視之如父」。
《中五畢業時與恩師合照》
李Sir,我嘅授業恩師,我又唔諗住拎十大傑青,又唔知下一次公開演講機會係幾時,仲要可以霸住成個台,所以我想借住今晚同你講,我未必係一位足以令你覺得驕傲嘅學生,但我希望我唔係一位令你掉架嘅學生。或者,我響各個界別都唔算成功,但我做人一定唔算失敗。因為我一直緊記,你用人生教曉我「擇善固執、堅持原則」呢八個字,多謝你成就左我。我同我太太都多謝你。今日來嘅賓客,都係比面我同家玲,我懇請大家以熱烈嘅掌聲,為我多謝我呢一位授業恩師 - 李Sir。
《恩師接受全場掌聲》
以上所有嘅人,好似併圖咁,令我人生呢幅畫,非常漂亮。今日,我地有機會向身邊嘅親朋戚友講聲多謝,其實係一種福氣。有一D人我想多謝佢都無機會,兩位好好好想睇到我結婚嘅人,都已經過身,但佢地永遠都會活響我心中。今晚嘅晚會我亦為佢地預留位置。我敬愛嘅外婆,同興叔。
《左:黃宏發、陳興 / 右:外婆李梅》
佢兩位響五個月之內先後過身,之後我好鍾意「惜緣」呢兩個字,後來我發覺「惜緣」多多少少帶住一種「向後望嘅遺憾」,有一日我見到家玲嘅笑容,我又諗到「及時」呢兩個字。今晚,大家會唔會覺得?能夠同你身邊嘅新知舊雨座埋一齊,其實都係一種緣分?值得好好珍惜呢?望多兩眼,傾多兩句呢?
十一年前,我遇到家玲,人生再唔感到迷惘,因為只要望一望家玲,我就知道我嘅方向響邊到。我一直認為家玲係上帝,響我呢生人送比我最好嘅禮物。我應承過家玲要令佢幸福、快樂、同滿足;咁多年喇,我總算叫做做到喇。我同家玲,連生同死都可以跨得過,我認為無乜野再值得我地驚。早前,我睇過一套電影叫「不再讓你孤單」,睇完之後,我閃過一句說話好想同你講:「能夠擁有一份完美嘅愛,係好難得,但有勇氣去擁抱一份缺陷美,就係更加可貴」我相信呢句說話,你一定會聽得明。
做我嘅朋友可能會覺得,我嘅故事幾好睇,高潮跌起;但我知道做我身邊果位,一定唔會好受,經常要為我擔驚受怕,仲要好似湊細路咁呵我。不過,有D乜野,幸福得過可以響一個人面前,做翻自己呢?我好清楚,我無論得到幾多,都唔及翻到屋企,見到你響到,聽到你把聲,就算只係傻梗梗,睇你響到支支攪攪,我就已經好心足,因為知道呢個係我地嘅家。
成日掛住一個人,係好美好嘅一件事,就算家玲現在響我面前,我都好掛住佢,因為佢好多得意樣,只出現過一、兩次,但就令我生命多左好多色彩。
家玲係響陽光普照嘅日子出生,我出世果日就橫風橫雨。家玲嘅出現,令我生命重新有左陽光,同希望。家玲,我太太,我終於可以令你姓葉喇!多謝你。我知道你為我地嘅婚禮,付出左好多心血。尤其係今年我有太多超出估計嘅變化,攪到成個婚禮都好似比曬你攪咁。我會繼續遵守我嘅承諾,用我一生去愛你,同繼續令你覺得幸福、快樂、同滿足;我相信你又可愛,又充滿自信嘅笑容,一直係我比你嘅。
大家都知到,我做人從來牙齒當金使,今晚我結婚,點可以淡普洱當白蘭地;但為左同家玲白頭到老,點都要D取捨。幾年前我嘅生意做得唔好,甚至覺得有D比自已人厄嘅感覺。有一日我翻到屋企,見到家玲抱住一隻大冰杯,一隻我一直好想要嘅冰杯,佢同我講:你要加油呀!我當刻即時眼濕濕!所以今晚o屬於我既第一杯,我以呢隻冰杯加堅野,敬各位嘅。大家倍我飲!
之後我當然會飲小D喇,所以等陣請大家高抬貴手,不過請各位今晚飲多杯。
最後,今晚嘅前半部我交左比主席王則左大律師,同佢太太Sylvia;當謝你地送咁大份禮比我地。
後半部,我就交比呢到老闆張家豪,家豪我對佢只有九隻字:夠義氣、有得傾,信得過。
再一次多謝各位。
《證婚人:蕭詠儀律師》
後半部,我就交比呢到老闆張家豪,家豪我對佢只有九隻字:夠義氣、有得傾,信得過。
《與譽宴老闆張家豪合照》
再一次多謝各位。
沒有留言:
發佈留言