2020年10月24日 - 《第八十一集》阿康(天水圍社區關注組顧問)、阿乾(天水圍社區關注組成員)：【社區工作由「小」做起~~】

 

節目重溫：https://www.rthk.hk/radio/radio1/programme/young_politician/episode/712452

Youtube 頻道：https://youtu.be/N9gwFAwjRAo

本集簡介：

喺去年嘅區議會選舉，參選人同當選人嘅平均年齡都創歷史新低，分別只有 40 歲同 38 歲，年輕一代嘅政治參與大大提升。不過，年齡嘅界限可能會比我哋嘅想像更加闊，而家就連只有十三四歲嘅年輕人都可以成立社區關注組，好似區議員咁跟進交通燈、公共衛生同交通等社區議題，而且做得有聲有色。

當中就有「天水圍社區關注組」，組織嘅成員大部份係中小學生，佢哋分別處理組織嘅行政、財政、出版同跟進社區議題各項工作，並同區議員合作，去了解同關心居民嘅需要。例如跟進區內菜檔胡亂擺放貨物同垃圾嘅問題，分別與東主、清潔工人溝通，及後喺議員嘅協助下，向食環署反映情況。另外，組織亦就區內的交通班次與公共設施作視察及提出建議。

但中小學生投入大量心力去社區服務，自然會遇上唔同困難。其一，佢哋欠缺穩定嘅財政資源，要長期投入社區工作會感到莫大嘅財政壓力；另一方面，中小學生嘅學業壓力繁重，要喺學業同社會政治參與之間取得平衡恐怕需要面對龐大嘅壓力，兩者佢地如何取得平衡？早前，關注組向區內長者派發口罩，但有人意圖搶去物資，年紀少少嘅佢地如何去面對成年人給予嘅挑戰？我們又可以如何以正面態度去理解佢哋對社會嘅熱誠呢？

今集政壇新秀訓練班，請嚟天水圍社區關注組成員 阿乾同顧問 阿康，同各位傾傾。